Димитрий Ростовский 1855, 237-239
Время есть мера видимого сего мира, и жизни нашея, и всех деемых в поднебесной по Божию устроению, меримая деньми, месяцами, летами, веками сотенными и веками тысящными. Делится же время на три части: на мимошедшее, настоящее и будущее. Мимошедшее время вемы, яко бе, но уже прейде и погибе, ниже бо возвратится когда. Будущего же времене чаем, но не вемы, каково то будет. Настоящее же мнимся имети, но ни сего имамы, кроме единаго краткого часца, глаголемого «ныне»; ныне есть, // и абие несть, прейде бо. Паки ино настает «ныне», паки и то преходит: якоже в делаемых и настрояемых часах минуты, едина по друзей идет не становяся; и якоже в текущей колеснице колесо не стоит на едином месте, но с места на место течет неудерживаемо: сице настоящее жизни нашея «ныне», несть стоящо, но непрестанно текущо, и есть то наше «ныне» аки предел между мимошедшим и грядущим временем, мимошедшее окончаваяй, грядущее же начинаяй. И аки в книзе и строке точка, между речениями разделяющая, едино речение окончавающая, другое же начинающая; но точка на едином стоит месте, наше же настоящее время, глаголемое «ныне», не весть стояти, но выну течет, аки капля некая, в низ текущая, и черту по себе оставляющая, на предняя же простирающаяся, донележе оскудеет и изсхнет.
То жизни нашея краткое настоящее «ныне» может ли что само собою деяти, созидати ли, или разоряти? дати ли кому что, или отъяти? Ничтоже, разве токмо тещи непрестанно; тещи же толь скоро, якоже по воздуху птица, и яко по морю корабль, ветром женомый, и яко стрела от напряженнаго лука, или якоже от заряженной пушки ядро испущенное, тако наше течет время, ни на малу чертицу остановляяся. Како убо может то настоящее, не стоящее же, но выну текущее время собою что деяти? не Бог ли вся делает, яже делает когда хотя, не смотря времени; вся бо времена, и лета, и дние, и часы, в его Божиих руках суть?
— Димитрий Ростовский св.
- Глосса: Время есть мера.
- Темы: Время, Мера, Настоящее, Прошлое
- Источник: Розыск о раскольнической брынской вере, о учении их, о делах их, и изъявление, яко вера их неправа, учение душевредно и дела их не Богоугодна. - Изд. 5. - М., 1855.
